نشر الفنان أحمد آمين، منشور عبر صفحته الرسمية على موقع التواصل الاجتماعي الفيس بوك، يوضح من خلاله عن رأيه بعدالجدل الطويل خلال الفترة السابقة بشأن حق الأداء العلني بعد الخلاف بين غرفة صناعة السينما والنقابات الفنية.
تعليق أحمد أمين على حق الأداء العلني
وكتب أحمد أمين، قائلا: “كلام كتير بيدور عن حق الأداء العلنى اليومين دول ومصدعينكم أنا عارف.. ناس كتير هتقول وأحنا مالنا فحبيت أحكيلكم الموضوع ببساطة”.
وأضاف أمين: “أى أغنية قديمة بتسمعها أو فيلم أو عمل فنى بيتعرض بيبقى فيه صناع كتير علاقتهم بالعمل ده عمرها ما بتخلص.. هما ابتكروه من سنين وده شغلهم وفكرهم، السؤال بقى.. هل ينفع أن العمل يعيش ويفضل يأثر على سمعة الفنان ويفضل يسعد ناس أكتر منغير ما يكون للصانع ده حق فى أنه ياخد ولو عائد بسيط من اللى بيرجع من إعادة عرض الأعمال دي”.
وتابع الفنان أحمد أمين: “ده اسمه فى الفن حق الأداء العلنى.. وده قانون قديم بالمناسبة من 2002 ومطبق فى أغلب دول العالم.. وفكرته مفعلة جدا على اليوتيوب مثلا.. وبيفضل صانع المحتوى يكسب عائد من من كل مشاهداته طول ما فيه ناس بتتفرج.. وكمان بيحمى اللى عامل الفيديو ده وما بيسمحش حد ياخد شغله وينزله فى مكان تاني”.
وأختتم أحمد أمين قائلا: “فيه فنانين (والقصص كتير) انتهت حياتهم بظروف صعبة جدا فى حين أنه عنده رصيد ضخم جدا من الأعمال بتتعرض لغاية النهارده، أنا مع تفعيل قانون حق الأداء العلنى.. وعمر ما حماية حقوق المبدعين ما هتكون ضد الاستثمار أو المنتجين وأصحاب الأعمال بالعكس أحنا كلنا فى مركب واحدة.. كلنا نفسنا فى صناعة أقوى قادرة تكمل وتسعد جمهور كبير كل يوم”.
