كتبت – سها يحيي
علقت نهاد أبو القمصان، رئيسة المركز المصري لحقوق المرأة، على قبول فريد الديب الدفاع عن قاتل نيرة أشرف، المعروفة إعلاميًا بـ”طالبة المنصورة”.
وكتبت “أبو القمصان”، في منشور عبر حسابها على “الفيس بوك”، “مين متعاطف مع قاتل ويدفع أتعاب فريد الديب؟، سؤال حائر دائر لكان السؤال الصح، هل فى متعاطفين مع قاتل نيرة فعلا ؟ وليه ؟، الموضوع مالوش علاقة بنيرة ومحمد، هما الاثنين اداة لصراع تم استخدامهم فيه، صراع نفوذ وضرب مفاصل الدولة واهم عمدانها وهو القانون والقضاء، بالراحة علشان تفهم، فى نظرية سياسية بتعتمد على استخدام حدث مؤثر فى الناس، اى حدث بهدف حاجتين؛ ضرب مؤسسات الدولة من خلال تحويلها مادة للسخرية، قياس القدرة على تغيير الحقائق وتحويل اتجاهات الراى العام، فيتم اختبار حادثة القتل الرهيبة دى ونبنى عليها شعارات تعاطف تجرجر الناس، بعدها نقول العدالة بايظة ونتريق”.
“الدية” اختراع ليس له علاقة بالقانون
وتابعت: “ولما فشلو والعدالة كانت نموذجية، بدأت حملة تزييف الوعى بلجان إلكترونية تجنن الناس الطبيعية، معقولة ؟ حد يتعاطف مع قاتل ؟، الحقيقة لاء ، الناس الطبيعية مش متعاطفة ومستغربة ومش فاهمة، لكن الحملة أكبر من واحدة ست تعمل فيديو تقول دا واد غلبان والستات وحشه، فالصفحة بتاعتها تبقى من بعد ١٠٠ الف تصبح مليون، بالامر المباشر للتنظيم للدخول ورفع الصفحة، ودا اللى حاصل، بعدها ندعى جمع مال ، علشان اختراع مالوش علاقة بالقانون “الدية”، علشان يحطو مصطلحات جديدة تثبت اثرهم فى القضاء، ولما فشلو يلبسوا القضاء المصطلح نتيجة وعى الناس ان دا مش قانونى اصلا، المال يستخدم فى حته تانية، ولا فى تبرعات ولا حد دفع مليم اصلا لان التنظيم هو اللي هيدفع، يتفضل ايه .. النقض، اللى هو وجوبى ولازم يتعمل فى أحكام الإعدام، والنيابة ملزمة تعمله بالقانون حتى لو القاتل معملهوش”.
ضرب فكرة الدولة والعدالة
وأضافت: “نكمل اللعب ازاى ؟ نجيب اكبر محامى اتعابه ملايين .. مش علشان محمد اصلا، علشان نقول ان فى متعاطفين ومتبرعين بالملايين والدولة ظالمة، والبنت اللى مش محجبة تستاهل القتل، علشان نوصل لنتيجة ايه؟، ضرب فكرة الدولة والعدالة ونلبس البنات القفة، واشاعة حالة من اليأس والاحباط، وإن اى حاجة تتحل بالفلوس للى معاه، وياعينى محمد الغلبان ربنا اللى معاه ودفع له، ونخوف باقى الغلابة لو فى الموقف دا يعملو ايه فى البلد الوحشة اللى ميقدرش يعيش فيها الغلابة، نفس اللعبة اتعملت سنة ٢٠١١ بعد الثورة عالطول مع بلطجى اسمه “سامبو “، كان حرامى وبلطحى ومسجل خطر، ضرب عسكرى وخد منه سلاحه، اتعمل عليه حمله لدرجة ان بعض الحلوين راحو يحتفلو بعيد ميلاد سامبو فى قسم الشرطة، ورسمو له جدارية ضخمة فى شارع محمد محمود واقف بجانبه السلاح الميرى المسروق”.
واختتمت كلامها قائلة: “الخلاصة؛ لا نيرة ولا محمد هما الموضوع، وفريد الديب استاذ فى الملاعب، حد جاب له ملايين وقاله خدها ومش عايزينك تعمل حاجة ، عايزين نقول أن فى تبرع ملايين، فكرنى بمشهد عبقرى للمحامى الكبير فى فيلم طيور الظلام لعادل إمام “أشتغل ياحبيبى أشتغل”.
قبول فريد الديب الدفاع عن قاتل طالبة المنصورة
يذكر أن المحامي طارق العوضي أعلن عبر حسابه على “الفيس بوك”، قبول المحامي فريد الديب الدفاع عن قاتل نيرة أشرف بناء على طلب من متعاطفين مع المتهم في مصر واليونان وتكفلهم بسداد الاتعاب وليس من أهل المتهم.
