أثار مسلسل الحشاشين للفنان كريم عبد العزيز، حالة من الجدل منذ عرضه مع بداية شهر رمضان المبارك، حيث تساءل عدد كبير من رواد مواقع التواصل الاجتماعي عن سبب تحدث شخصيات المسلسل باللهجة العامية المصرية، رغم سير أحداث المسلسل بين القرنين الحادي عشر والثالث عشر الميلادي.
تعليق مخرج “الحشاشين”
ورد بيتر ميمي، مخرج المسلسل، على تساؤلات الجمهور حول مسلسل الحشاشين، حيث كتب عبر حسابه الرسمي على “فيسبوك”: “طيب كل سنة وأنتم طيبين، مع إنى مكنتش حابب اتكلم علشان دول كلهم ٤ حلقات!، مبدأيا المسلسل من وحي التاريخ، وده مكتوب نصًا فى التترات يعنى مش وثيقة تاريخية لكنه دراما تاريخية”.
وتابع “هو المخرج العالمي تارنتينو لما قتل هتلر فى السينما كان حقيقة؟، أو نابليون فى فيلم ريدلى سكوت الأخير، هل ده نابليون اللى فى كتب التاريخ؟ ديه دراما تاريخية، حاولنا نعمل خيال لفترة من الفترات فى شكل درامي، لكن رجعنا فى الديكور والملابس لمراجع كتيرة ونادرة عشان نعمل عالم مشوفنهوش قبل كده ومايكونش شبه أفلام أو مسلسلات عالمية”.
وأضاف: “هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره، والموجود اجتهاد، ماركو بولو أو فلادمير بارتول أو برنارد لويس أو فرهاد دفتري، وكتير جدا. حسن الصباح كان بيعمل معجزات؟ لا طبعا!!! وده تباعا مع الحلقات هيتفهم”.
وواصل: “الحشاشين مسلسل تاريخي بالعامية المصرية، الأحداث بين أتراك وفرس، لما عملوه الأتراك اتكلموا تركي ولما عملوه الأمريكان بيتكلموا إنجليزى، احنا عاملينه فى مصر والترجمة موجودة فى كل بلد، المسلسل بيتعرض فى روسيا وأمريكا وأكتر من بلد كل بلد بلغتها، هم الڤايكنجز كانوا بيتكلموا انجليزى؟ ولا ويليام والاس كان بيتكلم اللكنة الأمريكية”.
واستكمل: “ليه حسن الصباح؟ حسن الصباح شخصية فذة وغريبة ومستفذة إنك تعرف عنها، مش لازم يكون رمز للخير علشان يتعمله مسلسل، هتلر وراسبوتين كانا فى منتهى الشر لكنهما شخصيات فذة غيرت العالم، أو على مستوانا المصرى خط الصعيد أو سفاح إسكندرية”.
وأستطرد: “حاجات صغيرة أيضا، أم الخليفة رصد كانت نوبية الأصل، إسكندرية مدينة فى مصر، لأن فى مدن كتير باسم إسكندرية حوالين العالم، لزم التوضيح للترجمة لأن فيه غير مصريين بيتفرجوا على المسلسل، مجاعة القاهرة الفاطمية مثبوتة تاريخيا لكن تعددت أشكالها حسب المصادر وهى على فكرة كانت قبل وصول حسن بفترة مش بعيدة بس ديه دراما (من وحي التاريخ)، ما تسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة ٨، عم ملك شاه اتقتل بوتر القوس لان ده كان عرف وتقليد”.
واختتم: “مين الست اللى بتظهر لحسن الصباح؟ ده فى حلقة ٣٠ بقى لو ربنا ادانا عمر، كل سنة وأنتم طيبين وسعيد إن المسلسل خلاكم تقرأوا وتسألوا، وشوية شوية هتفهموا المسلسل، صحصحوا معانا كده يا شباب خلونا نعمل شكل جديد، وتبقى بداية ومع الوقت يتعمل أفضل وأكبر وأحسن من اللى احنا عاملينه، ومع الوقت ننافس، سنغزو العالم”.
فتحي عبد الوهاب يدافع
ومن جانبه، قال الفنان فتحي عبد الوهاب، أحد أبطال “الحشاشين” الذي يجسد دور قوام الدين أبو علي الحسن بن علي الطوسي والملقب بـ”نظام الملك”، خلال تصريحات تليفزيونية، “أحداث الحشاشين الدرامية مستوحاة ومستلهمة من التاريخ وهي ليست التاريخ، وهي مش درس تاريخ هي دراما مستلهمة من أحداث حصلت فعلا وشخصيات حقيقية وحروب ومجاعات وأشخاص لكن فيها جزء مؤلف وجزء درامي، وده مش عذر ولا أي حاجة لأي خطأ قد يكون غير مقصود”.
مسلسل “الحشاشين”
يذكر أن مسلسل “الحشاشين” سيناريو وحوار عبد الرحيم كمال، إخراج بيتر ميمي، وبطولة كريم عبدالعزيز، فتحي عبدالوهاب، أحمد عيد، نيقولا معوض، ميرنا نور الدين، وعدد من الفنانين، ويعرض على قناة “dmc” يوميا طوال شهر رمضان 2024.
