تصدرت الفنانة فريدة سيف النصر مؤشرات بحث جوجل خلال الساعات الماضية، وذلك بعدما حلت ضيفة على برنامج “كلمة أخيرة”، مع الإعلامية لميس الحديدي.
وكشفت فريدة سيف النصر أثناء الحوار أسرارًا عن حياتها الشخصية وأعمالها الفنية.
وينشر “البورصجية نيوز” أبرز تصريحات فريدة سيف النصر في “كلمة أخيرة”..
الشباب لسه فاكريني بمشهد الفراخ مع عادل إمام في فيلم “مين فينا الحرامي” وأنا عديت 60 سنة خلاص هو أنا هتحنط وأفضل زي ما أنا.
بقول سني مش زي الستات وعندي أحفاد في أعمار سبع سنوات نفسي أشوف أحفادي عرايس ولاد محمد إبني.
مشواري الفني مكنش سهل وكان مليئ بالمطبات الهوائية والصناعية.
اتظلمت كتير واتنصرت مافيش مرة اتظلمت غير بعد ربنا أخد حقي وتعرضت لظلم كبير ومن شخصية كبيرة.
عملت بطولات كتير وبطولات كوميدية وإسمي قبل أي حد وكانوا بيقولوا عنها أفلام مقاولات وأنا أرفض بشدة هذه التسميات وأتحدى الجماعة إلى بيعملوا أفلام دلوقتي يجيبوا فنانين زي بتوع زمان.
مصطلح أفلام المقاولات إبتدع لهدم هؤلاء الفنانين ذي سمير غانم وغيره وأنا بقول للي بيقولوا أفلام مقاولات هاتو ظفر سمير غانم.
تزوجت وعمري 20 سنة بسبب خوف والدي عليا من الفضائح والشائعات بعد دوري في فيلم 4-2-4.
بدلة الرقص اللي رقصت بيها في فيلم 4-2-4 كانت مكشوفة والدنيا اتقلبت عليَّ بعدها، بابا وقتها قال لي انتي هتفضحينا؟! وبسبب كده خلاني أتجوز وأنا عندي 20 سنة، وخلفت محمد ابني، وفترة الجواز امتدت 8 سنين، ودي الجوازة الوحيدة اللي اتجوزتها، وكنا ننفصل ونرجع تاني.
تعرضت للخيانة وصديقتي المقربة خطفت جوزي وهي كانت من خارج الوسط، اكتشفت الخيانة، وهو بيكلمها في التليفون، وسمعت وقتها أحلى كلام، واللى سمعته لا يمكن تحمله رُحت مبهدلاهم الإثنين، فطلع لي برة وقال لي إزاي تكلميها كدة؟! دي جزمتها برقبتك وضربني، وقتها أصريت على الطلاق وبعد ما انفصل عني اتجوزها.
متجوزتش بعده لإني مبحبش التغيير، واتخطبت بعد الانفصال من رجل أعمال كبير بس مقدرتش أتجوز، وربيت ابني لوحدي واتربى مع إخواته من والده.
ماعملتش أي عمليات تجميل وليس لدي معرفة بيطلعوا عليَّ شائعات ملهاش أساس ليه، التجاعيد اللي ظهرت لي دي طبيعية لإني خلاص كبرت في السن.
شخصيتي في مسلسل “عملة نادرة” من أفضل أعمالي في مشواري الفني.
سبب تقديمي لأدوار الإغراء في بداية مشواري الفني هو هند رستم، حطيت نفسي في حتة البنت اللعوب في الأفلام وأغرتني هند رستم لما قالت أنا بشوف إن فريدة سيف النصر ممثلة إغراء، علشان دخلت في المنطقة دي.
