كشفت الفنانة أسماء جلال، عن إعجابها بالمطرب اللبناني وائل جسار، وذلك خلال تواجدها ضيفة في برنامج “معكم” الذي تقدمه الإعلامية منى الشاذلي، أمس الخميس، على قناة “أون”.
وقالت أسماء جلال، إنها تحب وائل جسار وتحفظ كل أغانيه، متابعة: “في فترة من الفترات كانت صوره في كل مكان في غرفتي، كنت الشخصية الملزقة اللي بحط صوره في الدولاب وفوق السرير والموضوع تطور بقيت بحضر كل حفلاته، وأكون أول واحدة أعرف هي فين واحجز ترابيزة ليا أنا بس واقعد أبص له، وابقى لابسة فستان وعايزاه يشوفني مع إنه متجوز، مش عارفة كنت بعمل إيه”.
وروت موقفًا محرجًا جمعها به في إحدى الحفلات: “طبعًا ولا أخد باله مني خالص لحد ما في مرة حصل موقف أعتقد هو خاف مني وقتها، كنت عايزة أتصور معاه واتصورت ولفيت له وقلتله انت عارف إننا هنتجوز قالي لا والله، كنت صغيرة والله العظيم وقتها ومبقتش بحضر حفلاته تاني عشان محرجش نفسي”.
وأضافت: “أنا بحبه بس مبقتش بعمل زي زمان، وربنا يباركله في مراته وأولاده”.
يذكر أن أسماء جلال يُعرض لها حاليا فيلم “اللعب مع العيال” إخراج شريف عرفة، وبطولة محمد إمام، كما تشارك كضيفة شرف في الجزء الثالث من فيلم “ولاد رزق – القاضية” إخراج طارق العريان، بطولة أحمد عز، عمرو يوسف وآسر ياسين.
