تصدرت الفنانة آمال ماهر مؤشرات بحث جوجل خلال الساعات الماضية، وذلك بعد لقائها مع الإعلامي عمرو أديب، في برنامج “الحكاية” أمس الجمعة.
وكشفت آمال ماهر خلال اللقاء حقيقة الشائعات التي انتشرت بشأن اختطافها خلال الفترة الماضية.
وينشر “البورصجية نيوز” أبرز تصريحات آمال ماهر في “الحكاية”..
انتشرت شائعات عن أني اتخطفت وكنت بقول للناس والله ما في حاجة، وقعدت شوية مخضوضة والموضوع خد حجم أكبر من حجمه.
لما كنت أقول متخطفتش، كانوا بيكلموا ابني يسألوا، يقوللوا له مامتك كويسة؟، يقولهم أه، يقولوا مش مصدقينك، قرايبي كانوا بيقولوا لي ابعتي لنا صوتك.
اضطريت أقول للناس إني بخير لأن الموضوع كبر بزيادة، طلعت قبل أو بعد كانت الدنيا طارت، وماما كانت مضايقة مش من الشائعات من فكرة إني بتعذب.
أحب أقول جمهوري أنا بخير وقليلة الظهور، ولكن هبقى معاكم، وأنا بخير ومفيش حاجة اطمنوا.
الحمد لله ربنا وفقنا في الألبوم الجديد “أنا كويسة” وقدرنا نعمل فيه مواضيع جديدة لأول مرة أعمل مواضيع الصحاب، هي اتعملت قبل كدا بس ما حدش غنى لصاحب عمره ومفيش صديقة غنت لصديقتها.
بشكر كل فريق عمل الألبوم على تعبهم من شعراء وملحنين وموزعين وما بقاش فيه حاجة اسمها ألبوم المستمع ما بقاش متقبل أنك تنزل ألبوم كامل، يعني يدوب غنوة علشان الناس تاخد بالها منها، إنما أنك تنزل كم من الأغاني أنت كدا بتظلمها.
كل حاجة اتغيرت ورتم الحياة اتغير وما بقاش في أريحية أنك تنزل ألبوم كامل صعب، وبتابع على السوشيال ميديا عن الأغاني اللي معلقة مع الناس لأني بحب أسمع الفن دا حاجة في دمي.
مش بسمع أغانيَّ لما تنزل يدوب بس بشوف التعليقات، والأغاني ما بقتش بالأرقام بقيت بالتأثير في الشارع، النجاح ما بقاش مقياس بأرقام ولكن النجاح أن الجمهور يتكلم على أغانيك في الشارع وبقي صعب أنك تلاقي حاجة مميزة ولكن الكلام كتير.
فخورة بما يحدث في المملكة العربية السعودية من تطور وإبهار على مختلف الأصعدة الفنية.
جمعتني بالمستشار ترك آل الشيخ، رئيس الهيئة العامة للترفيه، علاقة فنية ناجحة وجمعتنا أغاني مميزة كثيرة من كلماته، وخلال الفترة المقبلة ستجدوني أُشارك بموسم الرياض الترفيهي.
استعد لسلسلة من الأعمال الكثيرة عقب الانتهاء من الموسم الرمضاني المقبل.
