تصدرت الفنانة منة شلبي مؤشرات بحث جوجل خلال الساعات الماضية، وذلك بعدما حلت ضيفة على برنامج “سهرانين”، مع الفنان أمير كرارة، على فناة “أون” أمس الخميس.
وينشر “البورصجية نيوز” أبرز تصريحات منة شلبي في “سهرانين”..
علاقتي بهند صبري في بداية حياتنا الفنية لم تكن جيدة، ولم نكن أصدقاء مقربين، احنا طلعنا في نفس الوقت وأدوارنا كانت جريئة في الأول فكنا متنافسين فأي حد كان بينقل كلام بينا كنا بنسخن.
اشتغلت مع هند صبري في فيلم أحلى الأوقات، وكل واحدة فينا كانت كتفها عالى على التانية، بس كنا محترمين، وبعدين اتعرض عليا فيلم بنات وسط البلد والمخرج محمد خان قاللي إننا هنكون بطلتي الفيلم، قلت له مفيش مشكلة أنا محترفة، وجلست مع هند صبري خلال التحضير للفيلم واكتشفنا إنه مفيش خلاف بينا وأن الموضوع عبارة عن نقل كلام، وقعدنا في بيت محمد خان واتصافينا، وبعدها بقينا شيء تاني خالص، بقينا زي أصحاب المدرسة.
في فترة فيلم الساحر مكنتش بعرف أمثل، وكنت مليانة لاني كنت بحب الأكل، وفقدت وزني عشان المخرج رضوان الكاشف يوافق على ضمي للفيلم وبعد الموافقة رجعت للأكل تاني واكتسبت وزن جديد، ورضوان الكاشف كان بيقولي هو أنا بصور فيل وكنت بقعد أعيط.
مكنتش مصدقة أن دوري كبير في فيلم الساحر، وتمثيلي كان زي الزفت، ومكنتش بعرف أتكلم في الفيلم بسبب محمود عبد العزيز لاني كنت بخاف منه.
محمود عبد العزيز كان أبويا الثاني وأستاذي ومعلمي وأول من قدمني، وأكتر واحد كنت بلجأ ليه أنا ووالدتي في الحياة، كان راجل مجدع وعظيم على المستوى الإنساني، بالإضافة إلى كونه ممثلا كبيرا، وأولاده كريم ومحمد مثل أخوتي، وأمي بتعتبرهم ولادها.
أمي زيزي مصطفى بالنسبة لي كل حاجة، ومش أم تقليدية وست عظيمة، ماما لو بتكلم أو عندي صفة كويسة في شخصيتي أو بتحمل مسئولية أو جدعة فأنا كبرت ولقيتها في أمي وهي صفات ورثتها منها، وبعد لما بقيت فنانة بقيت اشوف اللي عملته زيزي مصطفى كبير وكتير جدا انها في سن صغيرة قررت تسيب شغلها تماما وتتفرغلي انها تكوني كشخص وطالبة وبنت وفنانة، أمي ربنا يحميها وفعلا هي ست استثنائية.
