وجه الفنان طه دسوقي الشكر لجمهوره بعد إشادة عدد كبير بمسلسل “حالة خاصة”، وذلك عقب عرض 4 حلقات من المسلسل.
وقال دسوقي، خلال منشور عبر صفحته الرسمية على موقع التواصل الاجتماعي “فيس بوك”، “شكرًا كلمة قليلة جدًا على كم الحب والمباركات اللي جايالي منكم من أول عرض المسلسل، وأسف لو ملحقتش أرد على ناس كتير،
بس حابب أشكر أولا كل اللي سهل عليا إني أعمل شغلي وأسف لو هيبقى بوست طويل شوية”.
وتابع: “شكرا لكوتش التمثيل نديم اللي اشتغلنا مع بعض على الدور، شكرا للجمعية المصرية للتوحد ودكتورة داليا سليمان اللي ساعدوني أعرف أكتر وجاوبوني على أسئلة كتير جدًا عن التوحد، وقابلوني بناس كتير على طيف التوحد من مختلف المراحل”.
وأضاف: “شكرًا عبدالله أشرف اللي قابلته في الجمعية وكان معايا في مرحلة التحضير وفادني جدًا اني أتعرف عليه اكتر (بالمناسبة عبدالله دلوقتي شغال في تيم watch it)”.
وواصل: “شكرًا للصديقة الممثلة ملك ياسر اللي ساعدتني بمعلومات كتير عن التوحد وخاصة المرحلة اللي فيها نديم
شكرا لصديقتي الدحيحة: مراتي نادين اللي دايما في ضهري وتحمست معايا وقعدت دورتلي على حاجات اشوفها وأقراها عشان أعرف معلومات أكتر”.
واستكمل: “شكرًا لسالي فايز ولكل فريق ginger، شكرا أستاذي واخويا الكبير احمد أمين اللي مترددش لحظة انه يكون جنبي في أول حلقة من المسلسل واللي حقيقي من اكتر المشاهد اللي استمتعت بيها، ثانيا شكرًا لكل فريق العمل بداية من أستاذ طارق الجنايني اللي إختارني وحملني مسؤولية اني اكون ضمن المسلسل ده .. مرورا بالمؤلف مهاب طارق اللي عمل حدوتة مهمة وسلط الضوء على فئة ناس كتير أوي متعرفش عنها حاجة وقرر إنه يضفر أحداثها بأغاني فرقة المصريين .. والمخرج عبدالعزيز النجار اللي أنا متأكد اني تعبته معايا، وكل فريق العمل اللي ورا الكاميرا من مهندسة الديكور سالي الشامي والستايلست فريدة فؤاد ومهندس الصوت عمرو عصام وصولا للمونتير اللي اشتغل عالمشروع بحماس ميقلش عن أي حد فينا كريم سعد”.
واستطرد: “شكرًا لكل كرو التصوير على رأسهم أستاذ محمد عبد الرؤوف، شكرًا الأستاذة الكبيرة -مقاما مش سنا- غادة عادل على حبها وإحترامها لشغلها ودعمها ليا في مسلسل زي ده، شكرا ومبروك لزمايلي على مجهودهم هاجر السراج – وئام مجدي – احمد أزعر – حسن ابو الروس – على السبع – لينا إيهاب، شكرًا للعبقري هاني شنودة اللي ربط التجربة دي بالموسيقى بتاعته وبأغانيه وشرفنا كلنا بإنه يحط عليها إسمه، واخيراً شكرا تاني لكل حد كتب عن المسلسل او بعتلي او باركلي وأتمنى باقي المسلسل يعجبكوا، من قلبي شكرًا”.
