تصدر الفنان سامح الصريطي مؤشرات بحث جوجل خلال الساعات الماضية، وذلك بعدما حل ضيفًا وزوجته المطربة حنان على الفنانة والإعلامية إسعاد يونس، في برنامج “صاحبة السعادة”.
وتحدث الاثنان خلال اللقاء عن تفاصيل زواجهما، وهي الزيجة التي فاجأ بها الصريطي جمهوره.
وقال الصريطي، “كنت معجب بحنان من أول لحظة شفتها فيها، من يوم ما شفت حنان وأنا شايفها ملفتة ومحترمة ومحافظة على شكلها وسلوكياتها هادئة وجذابة ودا اللي شدني ليها”.
وواصل: “لما زرت حنان في بيتها مكنتش راسم على جواز بس لقيتها فرصة مناسبة في وجود ابنها هشام، وأخدت معايا بقدونس كإشارة على الاهتمام لأنها بتحبه”.
وتابع: “سافرت ألمانيا بعدها وبدأت أكلم حنان كأني مقلتلهاش حاجة لكن حسيت من إجاباتها بموافقتها على الزواج، وقالت لي إنها موافقة لكن عندها شرط واحد إن أولادها وأولادي يوافقوا”.
وأضاف: “أول ما قلت لابنتي ابتهال على فكرة ارتباطي بـحنان فرحت فرحة شديدة.
في حين قالت المطربة حنان: “أنا أعرف سامح من 4 سنين ونص، شوفته مرة في ندوة جنب بيتي واتكلمنا بعدها وبدأت صداقتنا، وكنا بنتكلم مرة كل شهرين”.
واستكملت: “طول الوقت كنت بحترمه كممثل وبني آدم ومبسوطة إني عرفته، وكل فترة كنت بكلمه أحكي له على حاجة مضيقاني، وكان دايمًا بيعزمني على ندوات وقعدات ثقافية في بيته”.
واستطردت: “عجبتني دماغ سامح والتقينا في حاجات كتير مع بعض، ومع الوقت بقينا نتكلم أكتر، وجه في مرة قالي تعرفي إنك وحشتيني.. فقلت له متشوفش وحش، وعزمته عندي ولما جه لقيته جايب حزمتين بقدونس.. قالي مش ده اللي انتي بتحبيه أنا جبتهولك، وبعد ما أتغدينا قالي مش فاضل غير إننا نتجوز، افتكرته بيهزر قالي أنا بتكلم جد”.
