قال رامي صبري خلال حواره مع الإعلامية أسما إبراهيم ببرنامج “حبر سري”على “القاهرة والناس”، إنه ليس له علاقة بالمهرجانات ويرفض غنائه، ويرفض أن يترك اللون الذي تميز فيه من الغناء.
رامي صبري يتحدث عن ويجز
وتابع: “أوافق أن أشارك في عمل غنائي ثنائي راب مع مروان بابلو وويجز، وأن ويجز مجتهد وفرض نجاحه وأغانيه معروفه، وجميع مطربي الراب نجحوا وليس هناك أي شخص ضد النجاح”.
وأضاف: “ويجز قريب من الراب وليس المهرجان، أما المهرجان موسيقى شعبي جاي من تحت أوي، لغة تانية غير اللغة بتاعتنا”.
وواصل: “ويجز زعلان مني ومش عارف ليه أنا قلت إني مش بفهم كلامه ودي حقيقة بس قلت عليه إنه بيعمل مزيكا حلوة ومجتهد”.
ويجز يهاجم رامي صبري
ومن جانبه، أعرب مطرب الراب ويجز عن استيائه من تصريحات الفنان رامي صبري بشأن مطربي الراب والمهرجانات.
وقال ويجز في فيديو على “إنستجرام”: “هتكلم على فنان فاكر إنه عنده الصلاحية إنه يطلع يتكلم عن أي حد في أي وقت والناس تسمع وتسكت”.
واستكمل: “الفنان دا اسمه رامي والفنان دا كل ما بيقعد من 4 لـ 5 شهور يزهق ويطلع يتكلم على بتوع الراب في التليفزيون”.
واستطرد: “هتتكلم امتي على بتوع البوب اللى أنت منهم واللى في مجالك أنا شايف مبتفهمش في الراب حاجة زى ما أنت قولت قبل كده، ومش هتعرف تعمله وانت كده مبتقدرش الفنانين وفاكر أن هما عايزين يوصلولك وهما اصلا معدينك بكتير أنت رقم 19 يا رامي أنت بعيد أوي”.
زوجة رامي صبري تدافع عنه
وتدخلت شيرين عادل، زوجة الفنان رامي صبري، على خط الأزمة، حيث دافعت عن زوجها، ونشرت جزءًا من اللقاء الإعلامي لزوجها عبر صفحتها الشخصية على “إنستجرام”.
وعلقت على المقطع قائلة: “ده جزء من الحلقة اللى رامى أتكلم فيها عن الراب، ومن هنا ورايح مش هسكت وهرد على أى حد يفكر يتكلم عنة تانى بأي طريقة مش عجباني”.
وأضافت: “أولاً رامى اتسأل سؤال فى برنامج ورد وعنده كل الصلاحية لأي رد أو إجابة على أي سؤال يعنى مفيش أي مانع يخلي رامى لما يتسأل سؤال ميجوابش”.
وتابعت: “ثانيا رامى صبرى ده !! يا حضرت فنان من أهم الفنانين فى الوطن العربي ومن اهم الأصوات ده لو حضرتك مش معانا فى مجال المزيكا”.
وواصلت: “وبعدين والله يا ريت رامي عنده الوقت بتاع حضرتك الفاضي اوى بتاع ٥ شهور فاضي يا ريت كنا نتمنى .. أما بقى موضوع رامى رقم كام ده هو الحقيقة مش شاغل بال رامى اوى”.
واستكملت: “بس لو حضرتك شايف ان رامى رقم ١٩ مع الأسف الشديد لازم أقول لحضرتك تبقى انت مش موجود على الخريطة من الأساس، وأغنية واحدة من رامي صبري بس تعمل تاريخ لناس”.
واستطردت: “محتاج تذاكر كويس وتعرف انت بتتكلم عن مين قبل ما تتكلم لأنك واضح انك عندك شغل تانى غير المزيكا لأنك لو جوا الشغلانة كنت مش هتقول ولا كلمة من الكلام ده علشان الناس متضحكش عليك لأنك اتكلمت عن فنان بجد مش جاي يهزر”.
واختتمت: “وأخيراً لما تحب تعمل دعاية لأغنيتك الجديدة ابعد عن إسم رامي صبري أنا عرفة ان اسمه ممكن يخلى الأغنية ترند بس حاول الأغنية بتاعتك الجديدة تعتمد فيها على نفسك”.
يذكر أن الخلافات بين ويجز ورامي صبري ليست جديدة؛ فقد سبق أن حدثت أزمة بينهما عندما صرح رامي صبري قبل سنوات أنه لا يفهم كلمات ويجز لكنه أشاد بكونه فنان ناجح وله قاعدة جماهيرية كبيرة
