من “ترخيص بيوت الدعارة” لـ”المساكنة”.. إيناس الدغيدي تثير الجدل بتصريحاتها في “الفصول الأربعة”

حالة من الجدل أثارتها المخرجة إيناس الدغيدي بسبب تصريحاتها خلال لقائها في برنامج “الفصول الأربعة”، الذي يقدمه الإعلامي علي ياسين.

ترخيص بيوت الدعارة

أوضحت الدغيدي أن ترخيص بيوت الدعارة بيحد من انتشار مرض الإيدز ومن العنف، متابعة: “لو واحدة بتشتغل كده لحسابها وحد قتلها مش هتعرف لكن لو بتشتغل في مكان هيبقى معروف مين عمل كده، لكن دلوقتي عمارة تلاقي فيها بيت بيدار للدعارة”.

وأضافت: “بيوت الدعارة كانت موجودة في العالم كله وكانت موجودة في مصر قبل الثورة، وترخيص بيوت الدعارة ملهاش علاقة بالدين، أنا مقولتش لازم أنا بقول فيها حماية للمجتمع واللي بيشتغل فيها، لما بتقنن أي حاجة أن بتحط له قوانين وأسس”.

وتابعت: “الدعارة مهنة موجودة في العالم كله من زمان أوي ولما بتحصرها وتحددها وتحط فيها قوانين والتزامات وعلاجات وصحة أنت بالعكس بتحميها بدل ما هي متسابه كده”.

وواصلت: “متحجروش علينا التفكير هو اللي يفكر يبقى كافر؟ اللي يناقش يبقى كافر، في علم وتطور وفي حاجات كتير أوي حصلت في الدنيا”.

فكرة المساكنة قبل الزواج

وأشارت الدغيدي، إلى أن المجتمع المصري تقبل إلى حد ما فكرة المساكنة قبل الزواج.

واستكملت: “أنا كنت عايشة مع واحد وأمي وأخواتي كانوا عارفين وكانت مشكلته في الديانة فقط،  ممارسة المساكنة حلال قبل الزواج، وذلك في حالة موافقة الطرفين والزواج في الإسلام له ثلاثة شروط القبول ثم العرض ثم الإشهار، وناقشت ذلك في فيلم مذكرات مراهقة”.

واستطردت: “قديمًا كانت الناس تتزوج عن طريق الموافقة ثم كان ينادي أحد الأشخاص في جميع الأماكن قائلًا:”فلان تزوج فلانة”.

انتحار سعاد حسني

قالت إيناس الدغيدي، إن الفنانة الراحلة سعاد حسني لم تقتل، كما أشار البعض بشأن ذلك، مشيرة إلى أنها بنسبة 70% سبب وفاتها انتحار.

وتابعت: “سعاد كانت بتاخد مهدئات على طول من وهي 44 سنة، وده اللي أثر عليها، وأنا شايفة أن بنسبة 70% كان انتحار”.

وأضافت: “بيتقال أن سعاد حسني اتقتلت عشان مذكراتها، طيب ما اتكتب عن المذكرات دي أفلام؟!”.